Ti år saman – no var det tid for noko nytt
Seniornett Norge er ein stor frivillig og ideell medlemsorganisasjon som arbeider for digital inkludering av seniorar. Gjennom kurs, rettleiing, lokale foreiningar og praktisk hjelp bidreg dei til at eldre kan vere trygge, sjølvstendige og aktive i ein stadig meir digital kvardag.
Mediebruket utvikla nye nettsider for Seniornett første gong i 2016, og har drifta og vidareutvikla dei sidan. Men om ein vil gjere omfattande endringar på ein nettstad etter ti år er det ofte betre å starte frå scratch enn å flikke på gamalt design og kode.
Mediebruket tilbaud eit større prosjekt delt i forprosjekt og hovudprosjekt. Målet var å utvikle ei ny, brukarvenleg, sikker og universelt utforma nettløysing som kunne møte behova til både seniorbrukarar og dei mange lokale redaktørane som arbeider med innhald på nettstaden.
Eit forprosjekt for å ta rette val
Seniornett har ein omfattande nettstad med mange innhaldstypar og brukargrupper. Difor tilrådde Mediebruket eit forprosjekt før sjølve utviklingsarbeidet.
I forprosjektet skulle vi kartleggje dagens løysing, sjå på kva funksjonar som faktisk blir brukte, vurdere publiseringssystem, pålogging og rollebasert tilgangsstyring. Dette skulle gi eit tryggare grunnlag for hovudprosjektet og gjere det lettare å prioritere riktig innanfor budsjett og behov.
Eit viktig poeng var at Seniornett ikkje berre trong ei ny nettside, men ein gjennomtenkt digital arbeidsflate – både for dei som besøker nettstaden og for dei som administrerer den.
Brukarvenlegheit stod sentralt i heile prosjektet. For Seniornett er målgruppa særleg viktig: Mange brukarar har ikkje vakse opp med digitale tenester, og kan oppleve innlogging, skjema, navigasjon og tekniske meldingar som utrygt eller uoversiktleg.
Mediebruket la difor vekt på å utvikle ei løysing med:
– enkel og oversiktleg navigasjon
– tydelege klikkflater og knappar
– forståelege feilmeldingar
– gode søkefunksjonar
– støtte for tastaturnavigasjon
– ryddig struktur for innhald
Samtidig måtte løysinga vere enkel for dei 83 lokale redaktørane. Seniornett har mange lokalforeiningar, og nettløysinga må støtte ulike nivå av erfaring og ansvar. Difor var rollebasert tilgangsstyring og eit reint, forståeleg kontrollpanel ein viktig del av vurderinga.
Universell utforming og tilgjengelegheit
Tilgjengelegheit var eit hovudpremiss i prosjektet. Nettstaden skulle vere enkel å bruke for alle, men med særleg vekt på seniorbrukarar.
Mediebruket la opp til at løysinga skulle tilfredsstille WCAG 2.1 nivå AA, fungere med skjermlesarar og andre hjelpemiddel, støtte forstørring utan tap av funksjonalitet og ha god lesbarheit, kontrast og struktur.
Universell utforming handlar her ikkje berre om formelle krav. For Seniornett er det ein del av sjølve samfunnsoppdraget: Å gjere digitale løysingar forståelege, trygge og tilgjengelege for menneske som elles lett kan falle utanfor.
Trygg pålogging og integrasjon mot tredjepart
Eit sentralt teknisk tema var pålogging og medlemsdata. Seniornett ønskte ei enklare og tryggare løysing for medlemmar, med mogleg integrasjon mot internt medlemsregister.
Mediebruket tilbaud å undersøkje moderne autentiseringsløysingar, single sign-on, eingongskode via mobil og synkronisering av medlemsstatus. Målet var å redusere friksjon for brukarane, samstundes som ein avgrensar kva personopplysningar som blir lagra i nettløysinga.
Dette er særleg viktig for Seniornett, fordi nettstaden behandlar informasjon om medlemmar og brukarar som skal kunne stole på at løysinga er trygg.
Mediebruket legg stor vekt på personvern og sikkerheit. For ein organisasjon som hjelper seniorar inn i den digitale kvardagen, må nettstaden ikkje berre vere sikker – han må også opplevast trygg.
Ny struktur, design og teknisk plattform
Seniornett hadde eit tydeleg ønske om å byggje navigasjonsstruktur og design på nytt. Mediebruket tilbaud ein prosess med informasjonsarkitektur, wireframes, prototype, design og teknisk oppsett.
Designet skulle vidareføre Seniornett sin visuelle identitet og blå profil, men gi nettstaden eit reinare, meir moderne og meir tilgjengeleg uttrykk. Hovudvekta skulle liggje på brukervennlegheit for målgruppa, der estetikk og funksjonalitet spelar saman.
Hovudprosjektet skulle også omfatte gjennomgang av innhaldstypar som sider, nyheiter, arrangement, lokalforeiningar, datamanualar, skjema, tabellar, dokument og brukarroller. Målet var eit ryddigare oppsett både for dei som brukar nettstaden og dei som administrerer den.
Ein langsiktig digital plattform
Mediebruket kjenner Seniornett frå før, noko som gir eit godt utgangspunkt for effektivt samarbeid og forståing av behova. Tilbodet var lagt opp som eit strukturert prosjekt fram mot lansering, med innsikt, brukartesting, design, teknisk utvikling, opplæring og kvalitetssikring.
Resultatet skulle bli meir enn ein ny nettstad. Målet var å gi Seniornett ei trygg, fleksibel og framtidsretta digital plattform som støttar organisasjonen sitt viktige arbeid for digital meistring.
For Mediebruket var dette eit prosjekt der brukaroppleving, tilgjengelegheit, sikkerheit og samfunnsnytte heng tett saman. Seniornett arbeider for at fleire eldre skal kunne delta i det digitale samfunnet. Vår jobb var å bidra med ei nettløysing som gjer dette arbeidet enklare, tryggare og meir tilgjengeleg.